Welcome to the blog of Santhosh Pala
കവിതകള്-സന്തോഷ് പാലാ
Wednesday, December 28, 2011
പാഠം നാല് - ചെമ്പരത്തിപ്പൂവ് ചില്ലറക്കാരനല്ല
ചെമ്പരത്തിപ്പൂവിന്റെ
പരിച്ഛേദം വരക്കാന്
പത്തു പ്രാവശ്യം
ഇമ്പോസിഷന്
കിട്ടിയാലെന്താ
പഠിച്ചല്ലോ!
പരാഗങ്ങള്
വായുവില്ക്കൂടി
പകരുമെന്ന്
വിശ്വസിച്ചിരുന്നതു
കൊണ്ടാണോന്നറിയില്ല
പെമ്പിള്ളേരോട്
വര്ത്താനം പറയുന്നത്
കണ്ടാല്
ചൂരല് പുറകിലൊളിപ്പിച്ച്
മത്തായി സാര്
പറന്നെത്തിയിരുന്നത്.
നായ്ക്കരുണപ്പൊടി
നാലു ബഞ്ചില് വീശിയാലെന്താ
നാലു ബക്കറ്റ് വെള്ളം കോരിയാലെന്താ
നാലു ദിവസം പുറത്തു നിന്നാലെന്താ
ചൂണ്ടിയില്ലേ മാഷേ
ചൂണ്ടുവിരലില്
തൂങ്ങിവന്നിരുന്നോളെ!
ചെവിപ്പുറകിലന്നു കേറിയ
ചെമ്പരത്തിപ്പൂവുമായി
സാറിന്ന്
ജീവശാസ്ത്രം തോമ്മാസാറെടുത്തോ
കണക്ക് ഞാന് പഠിപ്പിക്കാം
ചരിത്രം ഞാന് പഠിപ്പിക്കാം
എന്നും പറഞ്ഞ്
തെക്കോട്ടും വടക്കോട്ടും
നടപ്പാണ്
കണ്ടും കേട്ടും നിന്ന
ഒന്നാം മണി
കുടുകുടാച്ചിരിക്കുന്നു!
രണ്ടാം മണി
വെറുതെ ചിരിക്കുന്നു!
നാലുമണിക്ക്
കുലുങ്ങിക്കുലുങ്ങി-
ച്ചിരിക്കാനൊരുങ്ങുന്നു
വീട്ടിലേക്കുള്ള
വഴി കാണിച്ച്
വേറൊരെണ്ണം
സ്കൂള് മുറ്റത്ത്
രണ്ടു ചെമ്പരത്തിപ്പൂവുകള്
കെട്ടിപ്പിടിച്ച്
പൊട്ടിച്ചിരിക്കാന്
തുടങ്ങിയിട്ട്
നേരം കുറെയായി!
ചങ്കെടുത്ത് കാട്ടിയാലും
ചിലപ്പോഴങ്ങനെയാണ്
മനസ്സിരുത്തി പഠിക്കുന്നത്
ഒരു കാലത്തും മറക്കില്ലെന്ന്
സാറു തന്നെയല്ലേ
പറഞ്ഞു തന്നിട്ടുള്ളത്?!
Subscribe to:
Post Comments (Atom)
No comments:
Post a Comment